Fordómar

Undanfarnar vikur hefur mér blöskrað að heyra sumt fólk segja sínar skoðanir á útlendingum hér á Íslandi. Við Íslendingar virðumst vilja vera þátttakendur í alþjóða samfélaginu, stjórnmálamenn allra flokka keppast um að taka á sig heiðurinn af inngöngu Íslands í EES. Við viljum hafa landið opið og heimtum lægri tolla af matvöru og öðrum neysluvörum. Við viljum ferðast út um allan heim og fá senda hingað matvöru sem ekki er hægt að framleiða hér og ódýran fatnað og heimilistæki frá Asíu.

Þegar dæminu er snúið við og útlendingar vilja koma hingað þá kemur allt annar tónn í marga. Útlendingar borga skatta hér eins og annað fólk en auðvitað þurfa þeir að fá sitt í staðinn líka.

Þeirri bullsögu hefur verið haldið á lofti að útlendingar séu svo miklir glæpamenn en lögreglustjórinn í Reykjavík sá ástæðu til að taka það fram í fréttatíma að hlutfallslega fremja útlendingar ekki fleiri glæpi hérlendis en Íslendingar.

Útlendingar vinna margir hverjir störf sem aðrir vilja ekki vinna. Því miður neyðast þeir oft til að gera það vegna fordóma í Íslendingum sem líta ekki við þeirra menntun eða þekkingu. Slíkt er ekki einkamál viðkomandi aðila því samfélaginu er betur borgið ef við nýtum sérhæfingu starfsfólks. En auðvitað fá margir útlendingar (vonandi flestir) störf við sitt hæfi.

Ég hvet þá sem lauma á svona fordómum að leggja þá á hilluna. Fordómar byggjast á fáfræði og því fyrr sem við losnum við þá því fyrr getum við farið að læra hvort af öðru og aðlagast þessum breyttu aðstæðum.

Benetton er alltaf með svo flottan boðskap í auglýsingum sínum (ég varð bara að láta fallega mynd fylgja).

Jólagjafaóskalistinn

Ég vil taka það fram að þessi listi er ekki settur upp hérna vegna einhverrar græðgi heldur bara til að einfalda velunnurum mínum lífið fyrir jólin. Ég er alltaf að reyna að temja mér nægjusemi í öllu og hætta að leyfa mér að langa í hitt og þetta. En það eru nú að koma jól....

Snyrtivörur
Mac og Make Up Store eru með rosalega flottar vörur. Mig langar í flotta augnskugga til að leika mér með, brúna og græna tóna, blautan eyeliner og flotta glossa á varirnar. Mac fæst í Debenhams og MakeUpStore er í Kringlunni við Kringlubíó.

Árs áskrift að breska vogue
Maður verður nú að fylgjast með. Hægt að kaupa áskriftina hér.

Sléttujárn
Mitt er úr járni og var keypt 1999, það dugar ekki þegar slétta þarf toppinn á hverjum degi. Sléttujárn fást í öllum raftækjabúðum, fríhöfninni og örugglega í Hagkaup og þannig búðum líka.

Skó
Einhvernveginn svona skó, þeir fást út um allt núna. Eina er að hællinn má ekki vera mjög hár eða mjög mjór. Nota stærð 40 í támjóum skóm.

Ilmvatn
Uppáhalds ilmvatnið mitt, Stella Sheer frá Stellu McCartney, er alveg að verða búið og mig vantar nýtt.